A l'ennemy, l'ennemy foy promise,

   Ne se tiendra, les captifs retenus:

   Prins preme mort, et le reste en chemise,

   Donnant le reste pour estre secourus.

   Voille gallere voil de nef cachera,

   La grande classe viendra sortir la moindre,

   Dix naves proches le tourneront pousser,

   Grande vaincue unies à soy ioindre.

   En apres cinq troupeau ne mettra hors,

   Un fuytif pour Penelon laschera,

   Faux murmurer, secours venir par lors,

   Le chef le siege lors abandonnera.

   Sus la minuict conducteur de l'armee

   Se sauvera subit esvanouy,

   Sept ans apres la fame non blasmee

   A son retour ne dira onc ouy.

   Albi & Castres feront nouvelle ligue,

   Neuf Arriens Libon & Portugues,

   Carcas, Tholose consumeront leur brigue,

   Quand chef neuf monstre de Lauragues.

   Gardon Nyme si hault desborderont,

   Qu'on cuidera Deucalion renaistre,

   Dans le colosse la pluspart fuyront,

   Vesta sepulchre feu estaint apparoistre.

   Le grand conflit qu'on appreste à Nancy,

   L'Aemathien dira tout ie soubmets,

   L'isle Britanne par vin, sel en solcy,

   Hem. mi. deux Phi. long temps ne tiendra Mets.

   Index & poulse parfondera le front

   De Senegalia le Comte à son fils propre,

   La Myrnamee par plusieurs de prin front

   Trois dans sept iours blesses mors.

   De Castillon figuieres iour de brune,

   De femme infame naistra souverain prince

   Surnom de chausses perhume luy posthume

   Onc Roy ne fut si pire en sa province.

   Tasche de meurdre, enormes adulteres,

   Grand ennemy de tout le genre humain,

   Que sera pire qu'ayeuls, oncles, ne peres,

   En fer, feu, eau, sanguin & inhumain.

   Dessous Ionchere du dangereux passage

   Fera passer le postume sa bande,

   Les monts Pyrens passer hors son bagage,

   De Parpignan courira Duc à Tende.

   Esleu en Pape, d'esleu sera mocqué,

   Subit soudain esmeu prompt & timide,

   Par trop bon doux à mourir provoqué,

   Crainte estainte la nuict de sa mort guide.

   Sous la pasture d'animaux ruminant,

   Par eux conduict au ventre herbipolique,

   Soldats cachez, les armes bruit menant,

   Non loin temptez de cité Antipolique.

   Urnel Vaucile sans conseil de soy mesmes

   Hardit timide, par crainte prins, vaincu,

   Accompagné de plusieurs putains blesmes

   A Barcelonne aux chartreux convaincu.

   Pere duc vieux d'ans & de soif chargé,

   Au iour extreme fils desniant l'esguiere

   Dedans le puis vif mort viendra plongé,

   Senat au fil la mort longue & legere.

   Heureux au regne de France, heureux de vie

   Ignorant sang, mort, fureur & rapine,

   Par non flateurs seras mis en envie,

   Roy desrobé, trop de foye en cuisine.

   La Royne Ergaste voyant sa fille blesme,

   Par un regret dans l'estomach enclos,

   Crys lamentables seront lors d'Angolesme,

   Et au germain mariage forclos.

   Le rang Lorrain fera place à Vendosme,

   Le haut mis bas, & le bas mis haut,

   Le fils de Hamon sera esleu dans Rome,

   Et les deux grands seront mis en défaut.

   Iour que sera par Royne saluee,

   Le iour apres le salut, la priere:

   Le compte fait raison & valbuee,

   Par avant humble oncques ne fut si fiere.

   Tous les amys qu'auront tenu party,

   Pour rude en lettres mis mort et saccagé,

   Biens oubliez par fixe grand neanty,

   Que Romain peuple ne fut tant outragé.

   Par le despit du Roy soustenant moindre,

   Sera meurdry luy presentant les bagues

   Le pere au fils voulant noblesse poindre

   Fait, comme à Perse iadis feirent les Magues.

   Pour ne vouloir consentir au divorce,

   Qui puis apres sera cognu par force,

   Le roy des Isles sera chassé par force,

   Mis à son lieu qui le roy n'aura signe.

   Au peuple ingrat faictes les remonstrances,

   Par lors l'armee se saisira d'Antibe,

   Dans l'arc Monech feront les doleances

   Et à Freius l'un l'autre prendra ribe.

   La captif prince aux Italles vaincu

   Passera Gennes par mer iusqu'à Marseille,

   Par grand effort des forens survaincu,

   Sauf coup de feu barril liqueur d'abeille.

   Par Nebro ouvrir de Brisanne passage,

   Bien esloignez el rago fara muestra,

   Dans Pelligouxe sera commis l'outrage

   De la grande dame assise sur l'orchestra.

   Le successeur vengera son bon frere,

   Occuper regne souz umbre de vengeance,

   Occis ostacle son sang mort vitupere,

   Long temps Bretaigne tiendra avec la France.

   Par le cinquiesme & un grand Hercules

   Viendront le temple ouvrir de main bellique,

   Un Clement, Iule & Ascans recules,

   Lespee, clef, aigle, n'eurent onc si grand picque.

   Second & tiers qui font prime musique

   Sera par Roy en honneur sublimee,

   Par grasse & maigre presque demy eticque

   Raport de Venus faulx rendra deprimee.

   De POL MANSOL dans caverne caprine

   Caché & prins extrait hors par la barbe,

   Captif mené comme beste mastine

   Par Begourdans amenee pres de Tarbe.

   Nepveu & sang du sainct nouveau venu,

   Par le surnom soustient arcs & couvert

   Seront chassez & mis à mort chassez nu,

   En rouge & noir convertiront leur vert.

   Le sainct empire vienra en Germanie,

   Ismaëlites trouveront lieux ouverts,

   Anes voudront aussi la Carmanie,

   Les soustenans de terre tous couverts.

   Le grand empire chacun an devoit estre,

   Un sur les autres le viendra obtenir:

   Mais peu de temps sera son regne & estre,

   Deux ans aux naves se pourra soustenir.

   La faction cruelle à robbe longue,

   Viendra cacher souz les pointus poignaards:

   Saisir Florence le duc & lieu diphlongue,

   Sa descouverte par immurs & flangnards.

   Gaulois qu'empire par guerre occupera,

   Par son beau frere mineur sera trahy,

   Par cheval rude voltigeant trainera,

   Du fait le frere long temps sera hay.

   Puisnay royal flagrand d'ardant libide,

   Pour se iouyr de cousine germaine:

   Habit de femme au temple d'Arthemide:

   Allant Meurdry par incognu du Maine.

   Apres le Roy du soucq guerres parlant,

   L'isles Harmotique le tiendra à mespris:

   Quelques ans bons rongeant un & pillant,

   Par tyrannie à l'Isle changeant pris.

   L'assemblee grande pres du lac de Borget,

   Se ralieront pres de Montmelian:

   Marchans plus outre pensifs feront proget,

   Chambry Moriane combat sainct Iulian.

   Amour allegre non loin pose le siege,

   Au Sainct barbar feront les garnisons,

   Ursins Hadrie pour Gaulois feront plaige,

   Pour peur rendus de l'armée aux grisons.

   Premier fils vefue malheureux mariage,

   Sans nuls enfans deux Isles en discord,

   Avant dix huict incompetant eage,

   De l'autre pres plus bas sera l'accord.

   Le ieune nay au regne Britannique,

   Qu'aura le pere mourant recommandé,

   Iceluy mort LONOLE donra topique,

   Et à son fils le regne demandé.

   En la frontiere de Caussade & Charlus,

   Non guieres loing du fond de la vallee,

   De ville Franche musique à son de luths,

   Environnez combouls & grand mittee.

   Le regne humain d'Anglique geniture,

   Fera son regne paix union tenir:

   Captive guerre demy de sa closture,

   Long temps la paix leur fera maintenir.

   Le trop bon temps trop de bonté royalle,

   Fait & deffais prompt subit negligence:

   Legiers croira faux d'espouse loyalle,

   Luy mis à mort par sa benevolence.

   Par lors qu'un Roy sera contre les siens,

   Natif de Bloye subiuguera Ligures,

   Mammel, Cordube & les Dalmatiens,

   Des sept puis l'ombre à Roy estrennes & le mures.

   L'ombre du regne de Navarre non vray,

   Fera la vie de desort illegitime:

   La veu promis incertain de Cambray,

   Roy Orleans donra mur legitime.

   Vie sort mort de l'or vilaine indigne,

   Sera de Saxe non nouveau electeur:

   De Brunsvic mandra d'amour signe,

   Faux le rendant au peuple seducteur.

   De Bourze ville à la Dame Guyrlande,

   L'on mettra sus par la trahison faicte

   Le grand Prelat de Leon par Formande,

   Faux pellerins & ravisseurs deffaicte.

   De plus profond de l'Espaigne enseigne,

   Sortant du bout & des fins de l'Europe,

   Troubles passant aupres du pont de Laigne,

   Sera deffaicte par bande sa grand troupe.

   Jardin du monde aupres de cité neufve,

   Dans le chemin des montagnes cavées,

   Sera saisi et plongé dans le cuve,

   Beuvant par force eaux soulphre envenimées.

   La Meuse au iour terre de Luxembourg,

   Decouvrira Saturne & trois en lurne:

   Montaigne & pleine, ville, cité & bourg,

   Lorrain deluge, trahison par grand hurne.

   Des lieux plus bas du pays de Lorraine,

   Seront des basses Allemaignes unis:

   Par ceux du siege Picards, Normans, du Maisne

   Et aux cantons se seront reünis.

   Au lieu où LAYE & Scelde se marient,

   Seront les nopces de long temps maniees:

   Au lieu d'Anvers où la crappe charient,

   Ieune vieillesse consorte intaminee.

   Les trois pelices de loing s'entrebatron,

   La plus grand moindre demeurera à l'escoute:

   Le grand Selin n'en sera plus patron,

   Le nommera feu peltre blanche routte.

   Nee en ce monde par concubine fertive,

   A deux hault mise par les tristes nouvelles,

   Entre ennemis sera prinse captive,

   Amenee è Malings & Bruxelles.

   Les malheureuses nopces celebront

   En grande joye mais la fin malheureuse,

   Mary et mere nore desdaigneront,

   Le Phybe mort, et nore plus piteuse.

   Prelat royal son baissant trop tiré,

   Grand flux de sang sortira par sa bouche,

   Le regne Anglicque par regne respiré,

   Long temps mort vif en Tunis comme souche.

   Le sublevé ne cognoistra son sceptre,

   Les enfans ieunes des plus grands honnira:

   Oncques ne fut un plus ord cruel estre,

   Pour leurs espouses à mort noir bannira.

   Au temps du dueil que le felin monarque

   Guerroyera le ieune Aemathien:

   Gaule bransler, perecliter la barque,

   Tenter Phossens au Ponant entretien.

   Dedans Lyon vingt-cinq d'une halaine,

   Cinq citoyens Germains, Bressans, Latins;

   Par dessous noble conduiront longue traine

   Et descouverts par abbois de mastins.

   Je pleure Nisse, Mannego, Pize, Gennes,

   Savone, Sienne, Capue, Modene, Malte;

   Le dessus sang et glaive par estrennes,

   Feu, trembler terre, eau, malheureuse nolte.

   Betta, Vienne, Emorre Sacarbance,

   Voudront livrer aux Barbares Pannone:

   De feu & sang en cité de Bisance

   Les coniurez descouverts par matrone.

   Pres de Sorbin pour assaillir Ongrie,

   L'heraut de Brudes les viendra avertir:

   Chef Bisantin, Sallon de Sclavonie,

   A loy d'Arabes les viendra convertir.

   Cydron, Raguse, la cité au sainct Hieron,

   Reverdira le medicant secours:

   Mort fils de Roy par mort de deux heron,

   L'Arabe, Ongrie feront un mesme cours.

   Pleure Milan, pleure Lucques, Florance,

   Que ton grand Duc sur le char montera,

   Changer le siege pres de Venise s'advance,

   Lors que Colonne à Rome changera.

   O vaste Rome ta ruyne s'approche,

   Non de tes murs, de ton sang & substance:

   L'aspre par lettres fera si horrible coche,

   Fer poinctu mis à tous iusques au manche.

   Le chef de Londres par regne l'Americh,

   L'isle d'Escosse t'empiera par gelee:

   Roy Reb auront un si faux Antechrist,

   Qui les mettra trestous dans la meslee.

   Le tremblement si fort au mois de May,

   Saturne, Caper, Iupiter, Mercure au boeuf:

   Venus, aussi Cancer, Mars en Nonnay,

   Tombera gresle lors plus grosse qu'un oeuf.

   L'armée de mer devant cité tiendra,

   Puis partira sans faire longue allée:

   Citoyens grande proye en terre prendra,

   Retourner classe reprendre grande emblée.

   Le fer luysant de neuf vieux eslevé,

   Seront si grands par Midy Aquilon:

   De sa seur propre grandes alle levé,

   Fuyant meurdry au buisson d'Ambellon.

   Loeil par obiect fera telle excroissance,

   Tant & ardente que tombera la neige.

   Champ arrousé viendra en decroissance,

   Que le primat succombera à Rege.

   La terre & l'air geleront si grand eau,

   Lors qu'on viendra pour Ieudy venerer

   Ce qui sera iamais ne fut si beau,

   Des quatre parts le viendront honorer.

   L'an mil neuf cens nonante neuf sept mois,

   Du ciel viendra un grand Roy d'effrayeur:

   Resusciter le grand Roy d'Angolmois,

   Avant après Mars regner par bon heur.

   Le temps present avecques le passé,

   Sera iugé par grand Iovialiste:

   Le monde tard luy sera lassé,

   Et desloyl par le clergé iuriste.

   Au revolu du grand nombre septiesme,

   Approistra au temps jeux d'Hecatombe,

   Non esloigné du grand aage milliesme,

   Que les entrez sortiront de leur tombe.

   Tant attendu ne reviendra iamais.

   Dedans l'Europe, en Asie apparoistra,

   Un de la ligue yssu du grand Hermes,

   Et sur tous Roys des Orients croistra.

   Le grand Senat discernera la pompe,

   A l'un qu'apres sera vaincu chassez,

   Ses adherans seront à son de tromps

   Biens publiez, ennemis dechassez.

   Trente adherans de l'ordre des quirettes

   Bannis, leurs biens donnez ses adversaires,

   Tous leurs bienfaits seront pour demerites,

   Classe espargie delivrez aux Corsaires.

   Subite ioye en subite tristesse,

   Sera à Rome aux graces embrassees,

   Dueil, cris, pleurs, larm sang excellent liesse

   Contraires bandes surprinses & troussees.

   Les vieux chemins seront tous embellis,

   Lon passera à Memphis somentrees,

   Se grand Mercure d'Hercules fleur de lys

   Faisant trembler terre, mer & contrees.

   Au regne grand du grand regne regnant,

   Par force d'armes les grands portes d'airain

   Fera ouvrir, le Roy & Duc ioignant,

   Port demoly, nef à fons, our serain.

   Mis 1 tresor temple citadins Hesperiques,

   Dans iceluy retiré en secret lieu:

   Le temple ouvrir les liens fameliques,

   Reprens, ravis, proye horible au milieu.

   Cris, pleurs, larmes viendront avec couteaux,

   Semblant fuir, donront dernier assault:

   L'entour parques planter profonds plateaux,

   Vifs repoussez & meurdris de prinsault.

   De batailler ne sera donné signe,

   Du parc seront contraints de sortir hors:

   De grand l'entour srea cogneu l'ensigne,

   Qui fera mettre de tous les siens à morts.

   Le naturelle à si hault non bas,

   Le tard retour fera maris contens:

   Le Recloing ne sera sans debats,

   En employant & perdant tout son temps.

   Le viel tribun au point de la trehemide

   Sera pressee, captif ne delivrer,

   Le vueil non vueil, le mal parlant timide,

   Par legitime à ses amis livrer.

   Comme un gryphon viendra le Roy d'Europe,

   Accompagné de ceux d'Aquilon,

   De rouges & blancs conduira grand troupe,

   Et iront contre le Roy de Babylon.

   Grand Roy viendra prendre port pres de Nisse,

   Le grand empire de la mort si en fera

   Aux Antipolles posera son genisse,

   Par mer la Pille tout esvanouyra.

   Pieds & Cheval à la seconde vieille

   Feront entree vastient tout par la mer:

   Dedans le poil entrera de Marseille,

   Pleurs, crys & sang, onc nul temps si amer.

   De brique en marbre seront les murs reduicts,

   Sept & cinquante années pacifiques:

   Joie aux humains renoué l'aqueduicts,

   Santé, grand fruits, joye & temps mellifiques.

   Cent fois mourra le tyran inhumain,

   Mis à son lieu sçavant & debonnaire,

   Tout le Senat sera dessous sa main,

   Fasché sera par malin temeraire.

   Clergé Romain l'an mil six cens & neuf,

   Au chef de l'an fera election:

   D'un gris & noir de la Compagne yssu,

   Qui onc ne fut si maling.

   Devant le pere l'enfant sera tué,

   Le pere apres entre cordes de ionc,

   Genevois peuple sera esvertué,

   Gisant le chef au milieu comme un tronc.

   La barque neufve les voyages,

   Là & aupres transferont l'Empire:

   Beaucaire, Arles retiendront les hostages,

   Pres deux colomnes trouvées de Porphire.

   De Nismes, d'Arles, & Vienne contemner,

   N'obey tout à l'edict d'Hespericque:

   Aux labouriez pour le grand condamner,

   Six eschappez en habit seraphicque.

   Dans les Espaignes viendra Roy tres puissant,

   Par mer & terre subiuguant or Midy:

   Ce mal fera, rabaissant le croissant,

   Baisser les aisles à ceux du Vendredy.

   Religion du nom de mers vaincra,

   Contre la secte fils Adaluncatif,

   Secte obstinee deploree craindra

   Des deux blessez par Aleph & Aleph.

   Triremes pleines tout aage captifs,

   Temps bon à mal, le doux pour amertume:

   Proye à Barbares trop trost seront hastifs,

   Cupide de voir plaindre au vent la plume.

   La splendeur claire à pucelle joyeuse,

   Ne luyra plus, long temps sera sans sel

   Avec marchans, ruffiens, loups odieuse,

   Tous pesle mesle monstre universel.

   La fin le loup, le lyon boeuf & l'asme,

   Timide dama seront avec mastins:

   Plus ne cherra à eux la douce manne,

   Plus vigilance & custode aux mastins.

   Le grand Empire sera par Angleterre,

   Le Pempotam des ans plus de trois cens:

   Grandes copies passer par mer & terre,

   Les Lusitains n'en seront pas contens.