Siecle nouveau, alliance nouvelle,

   Un Marquisat mis dedans la nacelle,

   A qui plus fort des deux l'emportera:

   D'un Duc, d'un Roy, gallere de Florence,

   Port à Marseille, Pucelle dans la France,

   De Catherine fort chef on rasera.

   Que d'or, d'argent fera despendre,

   Quand Comte voudra ville prendre,

   Tant de mille & mille soldats,

   Tuez, noyez, sans y rien faire,

   Dans plus forte mettra pied terre,

   Pigmée ayde des Censuarts.

   La ville sans dessus dessous,

   Renversee de mille coups

   De canons: & forts dessous terre:

   Cinq ans tiendra: le tout remis,

   Et laschee a ses ennemis,

   L'eau leur fera apres la guerre.

   D'un rond, d'un lis, naistra un si grand Prince,

   Bien tost & tard venu dans sa Province,

   Saturne en Libra en exaltation:

   Maison de Venus en descroissante force,

   Dame en apres masculin soubs l'escorse,

   Pour maintenir l'heureux sang de Bourbon.

   Celuy qui la Principauté

   Tiendra par grande cruauté,

   A la fin verra grand phalange:

   Par coup de feu tres-dangereux,

   Par accord pourroit faire mieux,

   Autrement boira suc d'Orange.

   Quand de Robin la traiteuse entreprise

   Mettra Seigneurs & en peine un grand Prince,

   Sceu par la Fin, chef on lui trenchera:

   La plume au vent, amye dans Espaigne,

   Poste attrappé estant en la campagne,

   Et l'escrivain dans l'eauë se iettera.

   La sangsue au loup se ioindra,

   Lors qu'en mer le bled defaudra,

   Mais le grand Prince sans envie,

   Par ambassade lui donra

   De son bled, pour luy donner vie,

   Pour un besoin s'en pourvoira.

   Un peu devant l'ouvert commerce

   Ambassadeur viendra de Perse,

   Nouvelle au franc pays porter:

   Mais non receu, vaine esperance,

   A son grand Dieu sera l'offense,

   Feignant de le vouloir quitter.

   Deux estendars du costé de l'Auvergne,

   Senestre pris, pour un temps prison regne,

   Et une Dame enfans voudra mener:

   Au Censuart, mais descouvert l'affaire

   Danger de mort murmure sur la terre,

   Germain, Bastille frere & soeur prisonnier.

   Ambassadeur pour une Dame,

   A son vaisseau mettra la rame,

   Pour prier le grand medecin:

   Que de l'oster de telle peine,

   Mais en ce s'opposera Royne

   Grand peine avant qu'en veoir la fin.

   Durant ce siecle on verra deux ruisseaux,

   Tout un terroir innonder de leurs eaux,

   Et submerger par ruisseaux et fontaines:

   Coups & Moufrin Beccoyran, & ales

   Par le gardon bien souvent travaillez,

   Sis cens & quatre alez, & trente moines.

   Six cens & cinq tres grand'nouvelle,

   De deux Seigneurs la grand querelle,

   Proche de Genaudan sera,

   A une Eglise aprse l'offrande

   Meurtre commis, prestre demande

   Tremblant de peur se sauvera.

   L'aventurier six cens & six ou neuf,

   Sera surpris par fiel mis dans un oeuf,

   Et peu apres sera hors de puissance

   Par le puissant Empereur general,

   Qu'au monde n'est un pareil ny esgal,

   Dont un chascun luyrend obeissance.

   Au grand siege encor grands forfaits,

   Recommençant plus que iamais

   Six cens & cinq sur la verdure,

   La prise & reprise sera

   Soldats és champs iusqu'en froidure

   Puis apres recommencera.

   Nouveau esleu patron du grand vaisseau,

   Verra long temps briller le clerc flambeau

   Qui sera de lampe à ce grand territoire,

   Et auquel temps armez sous son nom,

   Ioinctes à celles de l'heureux de Bourbon

   Levant, Ponant, & Couchant sa memoire.

   En Octobre six cens & cinq,

   Pourvoyeur du monstre marin,

   Prendra du souverain le cresme

   Ou en six cens & six, en Iuin,

   Grand'ioye aux grands & au commun

   Grands faits apres ce grand baptesme.

   Au mesme temps un grand endurera,

   Ioyeux mal sain, l'an complet ne verra,

   Et quelques uns qiu seront de la feste,

   Feste pour un seulement, à ce iour,

   Mais peu après sans faire un long seiour,

   Deux se donront, l'un l'autre de la teste.

   Considerant la triste Philomelle

   Qu'en pleurs & cris sa peine renouvelle,

   Racourcissant par tel moyen ses iours,

   Six cens & cinq, elle en verra l'issue,

   De son tourment, ia la toile tissue,

   Par son moyen senestre aura secours.

   Six cens & cinq, six cens & six & sept,

   Nous monstrera iusques l'an dixsept,

   Du boutefeu lire, hayne & envie,

   Soubs l'olivier d'assez long temps caché,

   Le Crocodil sur la terre a caché,

   Ce qui estoit mort, sera pour lors en vie.

   Celuy qui à par plusieurs fois

   Tenu la cage & puis les bois,

   R'entre à son premier estre

   Vie sauve peu apres sortir,

   Ne se sçavant encor cognoistre,

   Cherchera subiet pour mourir.

   L'autheur des maux commencera regner

   En l'an six cens & sept sans espargner

   Tous les subiet qui sont à la sangsue,

   Et puis apres s'en viendra peu à peu,

   Au franc pays r'allumer son feu,

   S'en retournant d'où elle yssue.

   Cil qui dira, descouvrissant l'affaire,

   Comme du mort, la mort pourra bien faire

   Coups de poignard par un qu'auront induit,

   Sa fin sera pis qu'il n'aura fait faire

   La fin conduit les hommes sur la terre,

   Gueté partout, tant le iour que la nuit.

   Quand la grand nef, la proüe & gouvernail,

   Du franc pays & son esprit vital,

   D'escueils & flots par la mer secoüee,

   Six cens & sept, & dix coeur assiegé

   Et des reflus de son corps affligé,

   Sa vie estant sur ce mal renoüee.

   Le Mercurial non de trop longue vie,

   Six cens & huict & vingt, grand maladie,

   Et encor pis danger du feu & d'eau,

   Son grand amy lors luy sera contraire,

   De tels hazards se pourroit bien distraire,

   Mais bref, le fer luy fera son tombeau.

   Six cens & six, six cens & neuf,

   Un Chancelier gros comme un boeuf,

   Vieux comme le Phoenix du monde,

   En ce terroir plus ne luyra,

   De la nef d'oubly passera

   Aux champs Elisiens faire ronde.

   Deux freres sont de l'ordre Ecclesiastique,

   Dont l'un prendra pour la France la pique,

   Encor un coup, si l'an six cens & six

   N'est affligé d'une grand'maladie,

   Les armes en main iusques six cens & dix,

   Guieres plus loing ne s'estendant sa vie.

   Celeste feu du costé d'Occident,

   Et du Midy, courir jusques au Levant,

   Vers demy morts sans point trouver racine,

   Troisième aage, à Mars le Belliqueux,

   Des Escarboucles on verra briller feux,

   Aage Escarboucle, et à la fin famine.

   L'an mil six cens & neuf ou quatorziesme,

   Le vieux Charon fera Pasques en Caresme,

   Six cens & six, par escrit le mettra

   Le Medecin, de tout cecy s'estonne,

   A mesme temps assigné en personne

   Mais pour certain l'un d'eux comparoistra.

   Le Griffon se peut apprester

   Pour à l'ennemy resister

   Et renforcer bien son armee,

   Autrement l'Elephant viendra

   Qui d'un abord le surprendra,

   Six cens & huict, mer enflammee.

   Dans peu de temps Medecin du grand mal,

   Et la sangsüe d'ordre & rang inegal,

   Mettront le feu à la branche d'Olive,

   Poste courir, d'un & d'autre costé,

   Et par tel feu leur Empire accosté,

   Se r'alumant du franc finy salive.

   Celuy qui a, les hazards surmonté,

   Qui fer, feu, eauë, n'a jamais redouté,

   Et du pays bien proche du Basacle,

   D'un coup de fer tout le monde estonné,

   Par Crocodil estrangement donné,

   Peuple ravi de veoir un tel spectacle.

   Vin à foison, tres-bon pour les gandarmes,

   Pleurs & soupirs, plainctes cris & alarmes

   Le Ciel fera ses tonnerres pleuvoir

   Feu, eau & sang, le tout meslé ensemble,

   Le Ciel de sol, en fremit & en tremble,

   Vivant n'a veu ce qu'il pourra bien veoir.

   Bien peu apres sera tres-grand misere,

   Du peu de bled, qui sera sur la terre,

   Du Dauphiné, Provence & Viverois,

   Au Vivaeois est un pauvre presage,

   Pere du fils, sera antropophage,

   Et mangeront racine & gland du bois.

   Princes & Seigneurs tous se feront la guerre,

   Cousin germain, le frere avec le frere,

   Finy l'Arby de l'heureux de Bourbon,

   De Hierusalem les Princes tant aymables,

   Du fait commis enorme & execrable,

   Se ressentiront sur la bourse sans fond.

   Dame par mort grandement attristee,

   Mere & tutrice au sang qui l'a quittee,

   Dame & Seigneurs, faits enfants orphelins,

   Par les aspics & parr les Crocodilles,

   Seront surpris forts Bourgs, Chasteaux & Villes

   Dieu tout puissant les garde des malins.

   La grand rumeur qui sera par la France,

   Les impuissant voudront avoir puissance,

   Langue emmiellee & vrays Cameleons,

   De boute-feux, allumeurs de chandelles,

   Pyes & geys, rapporteurs de nouvelles

   Sont la morsure semblera Scorpions.

   Foible & puissant seront en grand discord,

   Plusieurs mourront avant faire l'accord

   Foible au puissant vainqueur se fera dire,

   Le plus puissant au ieune cedera,

   Et le plus vieux des deux decedera,

   Lors que l'un d'eux envahira l'Empire.

   Par eau, & par fer, & par grande maladie,

   Le pourvoyeur à l'hazard de sa vie

   Sçaura combien vaut le quintal du bois,

   Six cens & quinze, ou le dixneufiesme,

   On gravera d'un grand Prince cinquiesme

   L'immortel nom, sur le pied de la Croix.

   Le pourvoyeur du monstre sans pareil,

   Se fera veoir ainsi que le Soleil,

   Montant le long la ligne Meridienne,

   En poursuivant l'Elephant & le loup,

   Nul Empereur ne fit iamais tel coup,

   Et rien plus pis à ce Prince n'advienne.

   Ce qu'en vivant le pere n'avoit sceu,

   Il acquerra ou par guerre, ou par feu,

   Et combattra a sangsue irritée,

   Ou iouyra de son bien paternel

   Et favory du grand Dieu Eternel,

   Aura bien tost sa Province heritée.

   Vaisseaux, galleres avec leur estendar,

   S'entrebattront pres du mont Gilbattar,

   Et lors sera fors fait à Pampelonne,

   Qui pour son bien souffrira mille maux,

   Par plusieurs fois soustiendra les assaux,

   Mais à la fin unie à la Couronne.

   La grand'Cité où est le premier homme,

   Bien amplement la ville ie vous nomme,

   Tout en alarme, & le soldat és champs

   Par fer & eaue, grandement affligee,

   Et à la fin, des François soulagee,

   Mais re sera des six cens & dix ans.

   Le petit coing, Provinces mutinees,

   Par forts Chasteaux se verront dominees,

   Encor un coup par la gent militaire,

   Dans bref seront fortement assiegez,

   Mais ils seront d'un tres grand soulagez,

   Qui aura fait entree dans Beaucaire.

   La belle roze en la France admiree,

   D'un tres-grand Prince à la fin desiree,

   Six cens & dix, lors naistront ses amours

   Cinq ans apres, sera d'un grand blessee

   Tu trait d'Amour, elle sera enlassee,

   Si à quinze ans du Ciel reçoit secours.

   De coup de fer, tout le monde estonné

   Par Crocodil estrangement donné,

   A un bien grand, parent de la sangsuë,

   Et peu apres sera un autre coup

   De guet à pend, commis contre le loup,

   Et de tels faits on en verra l'issuë.

   Le prouvoyeur mettra tout en desroutte,

   Sangsuë & loup, en mon dire n'escoutte

   Quand Mars sera au signe du Mouton

   Ioint à Saturne, & Saturne à la Lune,

   Alors sera ta plus grande infortune,

   Le Soleil lors en exaltation.

   Le grand d'Hongrie, ira dans la nacelle,

   Le nouveau né, fera guerre nouvelle

   A son voisin qu'il tiendra assiegé,

   Et le noireau avec son altesse,

   Ne souffrira, que par trop on le presse,

   Durant trois ans ses gens tiendra rangé.

   Du vieux Charon on verra le Phoenix,

   Estre premier & dernier de ses fils,

   Reluire en France, & d'un chacun aymable,

   Regner long temps, avec tous les honneurs

   Qu'auront iamais eu ses predecesseurs

   Dont il rendra sa gloire memorable.

   Venus & Sol, Iupiter & Mercure

   Augmenteront le genre de nature

   Grande Alliance en France se fera,

   Et du Midy la sangsuë de mesme,

   Le feu esteint par ce remede extreme,

   En terre ferme Olivier plantera.

   Un peu devant ou apres l'Angleterre

   Par mort de loup, mise aussi bas que terre,

   Verra le feu resister contre l'eaue,

   Le r'alumant avecques telle force

   Du sang humain, dessus l'humaine escorce

   Faite de pain, bondance de cousteau.

   La ville qu'avoit en ses ans

   Combattu l'iniure du temps,

   Qui de son vainqueur tient la vie,

   Celuy qui premier l'a surprist,

   Que peu apres François réprist,

   Par combats encor affoiblie.

   La grand Cité qui n'a pain à demy,

   Encor un coup la sainct Berthelemy

   Engravera au profond de son ame,

   Nismes, Rochelle, Geneve & Montpellier,

   Castre, Lyon, Mars entrant au Belier,

   S'entrebattront le tout pour une Dame.

   Plusieurs mourront avant que Phoenix meure,

   Iusques six cens septante est sa demeure,

   Passé quinze ans, vingt & un, trente neuf,

   Le premier est subiet à maladie,

   Et le second au fer, danger de vie,

   Au feu à l'eau, est subiet trente neuf.

   Six cens & quinze, vingt, Grand Dame mourra

   Et peu apres un fort long temps plouvra,

   Plusieurs pays, Flandres & l'Angleterre

   Seront par feu & par feu affligez,

   Contraints seront de leur faire la guerre.

   Un peu devan ou apres tres grand'Dame

   Son ame au Ciel, & son corps soubs la lame,

   De plusieurs gens regrettee sera,

   Tous ses parens seront en grand'tristesse,

   Pleurs & soupirs d'une Dame en ieunesse,

   Et à deux grands, le dueil delaissera.

   Tost l'Elephan de toutes parts verra

   Quand pourvoyeur au Griffon se ioindra,

   Sa ruine proche & Mars qui tousiours gronde

   Fera grands faits aupres de terre saincte

   Grands estendars sur la terre & sur l'onde,

   Si la nef a esté de deux freres enceinte.

   Peu aprse l'aliance faite,

   Avant solemniser la feste,

   l'Empereur le tout troublera

   Et la nouvelle mariee

   Au franc pays par sort liee,

   Dans peu de temps apres mourra.

   Sangsuë en peu de temps mourra,

   Sa mort bon signe nous donra,

   Pour l'accroissement de la France,

   Alliances se trouveront

   Deux grands Royaumes se ioindront,

   François aura sur eux puissance.